علبة النيدو

اتفقنا انا وخطيبي سابقا وزوجي حاليا انو نجهز بيتنا علي كيفنا من دون تدخلات لا من امو ولا امي  والحمدالله كل شي  ماشي تمام ومرة   كان مسافر  وكنت باروح البيت مع العمال او اجيب  حاجة واوديها وزي كدا يعني
وفي يوم من الايام كالعادة  اشتريت اكسسورات ورحت اوديها وفجاة لسا ابغا افتح الباب اسمع صوت جوى البيت .......وطبعا  فتحت الباب  لقيت اخوات زوجي  الله يعطيهم العافية جيين يتفقدوا البيت ......ممممممم ....المهم  انا انكسفت ايام ماكانو البنات ينكسفوا انو جيه لوحدي وكدا   وبعدين هدولا ستات كبار  وعيشتهم في المدينه    طبعا شالوني وحطوني زي مايقولو وبعد كدا ساروا حلوين وطيبين وبنحبكم
المهم كنت جايبة  تبرويهات  مرة كتير عشان المطبح  نسيت اقلكم اول مافتحت الباب لقيتهم قاعدين مكيفين على براد شاهي بالنعناع المديني ومريحين على الاخرررر
نرجع للموضوع لمن شافوا التبرويهات  دار الحوار الاتي
الاحت الكبيرة مرة :اشكلو دا ؟
انا :دي عشان المطبح يابلا
الاخت الكبيرة شويه : مررة حلوة من فين جبتيها؟ابغا اجيب زيها
انا: لازم نطقم؟ايش؟ باقول من المحل الفلاني يابلا
الاحت الكبيرة : وعلى ايه التهاويل دي الله يخلي علب النيدو على ايامنا .....
انا: معقولة يابلا ؟؟؟؟ لا لا  مو معقول اصلا منظر الدولاب حيكون وحش
هيا : لاوحش ولا شي بس انتو بنات دحين تبغوا تشتروا كل شي ولا تستعملوها تحبوا تتمنظروا......ممممممم...انتهى الحوار
واتزوجواالعرسان وخلفوا صبيان وبنات
وكل ماشفت علبة النيدو اضحك واقول هوا اللي ناقص اخزن في علب النيدو  ماعلب البلاستك على قفا من يشيل  اماااا معقوله
وتمر السنين  
وكالعادة سنة من السنين قبل رمضان ومقاضي رمضان واش ناقص واش مو ناقص جبت المقاضي والدادا بترتب كالعادة وتوزع الاغراض دار الحوار دا
مدام مافيه علبه بلاستيك هدا  واحد مافي كفي
انا  :طيب خلاص خلي بكرة
هيا :  طيب مدام هدا رز باقي انا حطو علبة نيدو هدا فاضي
انا : ايش ؟ اشبك اتجننتي لا طبعا
هيا :هيهيهي لا مدام مو على طول  بس بكراخلاص هيهيهيهي
انا: مممممم طيب يختي لحد بكرا
وجا بكرة وعدا بكرة وجا بعدو وبعد بعدو
وعلبة النيدو في الدولاب........انا....افتح الدولاب ....ياداداااا....بكرة مدام ....بكرة

علبة تانيه......علبة تالتة......ياداداااااااااااا

وصدق المثل.....اكبرمنك بيوم ...اعرف منك بسنة .....وبس